МЧЖнинг филиалларини ташкил этиш масалалари Фуқаролик кодекси ва МЧЖ тўғрисидаги Қонун нормалари билан тартибга солинади.

Филиал юридик шахснинг у турган ердан ташқарида жойлашган ҳамда унинг барча вазифаларини ёки вазифаларининг бир қисмини, шу жумладан ваколатхона -вазифаларини бажарадиган алоҳида бўлинмасидир (ФКнинг 47-м. 2-қ.).

МЧЖнинг филиалларини тузиш тўғрисидаги қарор жамият иштирокчилари умумий йиғилишининг мутлақ ваколатлари жумласига киради (МЧЖ тўғрисидаги Қонуннинг 30-м. 2-қ.).

Бир иштирокчидан таркиб топган жамиятда жамият иштирокчиларининг умумий йиғилиши ваколатлари жумласига кирувчи масалалар юзасидан қарорлар жамиятнинг ягона иштирокчиси томонидан якка тартибда қабул қилинади ва ёзма равишда расмийлаштирилади (МЧЖ тўғрисидаги Қонуннинг 37-м.).

Жамиятнинг таъсис ҳужжатларига киритилган ўзгартишлар давлат рўйхатидан ўтказилган пайтдан бошлаб учинчи шахслар учун кучга киради. Ваколатхоналар ва филиаллар ташкил этилиши, шунингдек жамиятнинг почта манзили ўзгариши билан боғлиқ ўзгартишлар киритилган ҳолларда, бундай ўзгартишлар юридик шахсларни давлат рўйхатидан ўтказувчи орган хабардор қилинган пайтдан бошлаб учинчи шахслар учун кучга киради (МЧЖ тўғрисидаги Қонуннинг 11-м. 5-қ.).

Филиаллар юридик шахс ҳисобланмайди. Улар ўзларини ташкил этган юридик шахс томонидан мол-мулк билан таъминланадилар ҳамда у тасдиқлаган низомлар асосида иш олиб борадилар.Филиалларнинг раҳбарлари юридик шахс томонидан тайинланади ҳамда унинг ишончномаси асосида иш олиб боради (ФКнинг 47-м. 3-қ.).

Шунга кўра, Сизнинг ҳолатингизда филиал ташкил этиш учун қуйидаги ишларни амалга ошириш лозим:

1) МЧЖ таъсисчиси томонидан филиал ташкил этиш ҳақида қарор қабул қилиниши;

2) МЧЖнинг уставини янги таҳрирда тасдиқлаш ва давлат рўйхатидан ўтказиш;

3) МЧЖ филиали тўғрисидаги низомни тасдиқлаш;

4) филиал раҳбарини тайинлаш ва унга ишончнома расмийлаштириш;

5) филиалга мол-мулк ажратиш.