Ходимнинг пенсия ёшига етганлиги ўз-ўзидан унга тайинланган меҳнатда майиб бўлганлик оқибатидаги ногиронлик пенсиясини пенсия ёшига доир пенсияга алмаштириш учун асос бўлмайди. Бир вақтнинг ўзида турли хил давлат пенсияларини олиш ҳуқуқига эга бўлган фуқарога унинг танловига кўра битта пенсия тайинланади (03.09.1993 й. 938-XII-сон ЎРҚ 4-м.). Шунинг учун ходимнинг пенсия ёшига етганлиги унинг ногиронлик пенсиясини автоматик равишда пенсия ёшига доир пенсияга алмаштиришни англатмайди.

Корхона ва ташкилотлар меҳнатда майиб бўлганлик ёки касб касаллиги оқибатида тайинланган ногиронлик пенсияларини тўлаш харажатларини Пенсия жамғармасига қоплайди (03.09.1993 й. 938-XII-сон ЎРҚ 66-м.). Шунинг учун ушбу масалада ходимнинг пенсия ёшига етганлиги эмас, балки унга амалда қайси турдаги пенсия тўланаётгани муҳим ҳисобланади. Агар ходим пенсия ёшига етганидан кейин ҳам меҳнатда майиб бўлганлик оқибатидаги ногиронлик пенсиясини олишда давом этса, ташкилот ушбу пенсияни тўлаш харажатларини қоплашни давом эттиради.

Агар ходимнинг аризаси ёки бошқа белгиланган тартиб асосида ногиронлик пенсияси ўрнига пенсия ёшига доир пенсия тайинланган ва ногиронлик пенсиясини тўлаш тўхтатилган бўлса, ташкилотнинг ногиронлик пенсияси бўйича харажатларни қоплаш мажбурияти ҳам ушбу пенсия амалда тўланган давр билан чекланади. Харажатларни қоплаш тартиби 14.12.2023 й.  661-сон ВМҚ билан тасдиқланган Низом билан тартибга солинади.

Демак, фақат ходимнинг пенсия ёшига етганлиги асосида тўловларни қоплашни тўхтатиш керак эмас. Аввало, Пенсия жамғармасидан ходимга ногиронлик пенсияси тўланиши давом этяптими ёки унга пенсия ёшига доир пенсия тайинланганми, шуни аниқлаш лозим.