Технологик асбоб-ускуналар импорт контракти асосида Ўзбекистон ҳудудига олиб кирилади.

Тузилган импорт контракти бўйича маълумотлар электрон шаклда Интерактив давлат хизматлари ягона портали орқали, электрон рақамли имзодан фойдаланган ҳолда киритилади.

СКнинг 211-моддаси 7-бандига ва БКнинг 297-моддаси 2-қисми 13-бандига мувофиқ юридик шахслар томонидан олиб кириладиган технологик ускуналарга қўшимча қиймат солиғи ва импорт божхона божи бўйича имтиёзлар тақдим этилади.

Тасдиқланган рўйхатга мувофиқ Ўзбекистон Республикаси ҳудудига олиб кирилган технологик асбоб-ускуналар (АВ томонидан 20.03.2013 йилда 2436-сон билан рўйхатга олинган) ҚҚС ва импорт божхона божидан озод қилинади.

Имтиёзлар янги технологик ускуналарга қўлланилади. Янги технологик ускуна деганда "эркин муомалага чиқариш" божхона режимида божхона расмийлаштируви вақтида, унинг ишлаб чиқарилган йили 3 йилдан кўп бўлмаган технологик ускуна тушунилади. Олиб келинадиган технологик жиҳозларнинг ишлаб чиқарилган йилини тасдиқлаш учун "эркин муомалага чиқариш" божхона режимига божхона расмийлаштируви пайтида олиб киритилаётган технологик жиҳознинг ишлаб чиқарилган йилини тасдиқловчи ишлаб чиқарувчи заводнинг техник паспорти ёки жиҳозларнинг улар томонидан ишлаб чиқарилганлиги, жумладан ишлаб чиқарилган йили тўғрисидаги тегишли маълумотларни ўз ичига олган ишлаб чиқарувчининг ҳужжати тақдим этилади.

Технологик жиҳозлар харид (импорт) қилинган пайтдан бошлаб уч йил ичида сотиб юборилган ёки текинга берилган бўлса, солиқ имтиёзлари бекор қилинади ва қонун ҳужжатларида белгиланган тартибда уларни тўлаш бўйича мажбуриятлар тикланади.

Бундан ташқари, СҚ 356-моддасига мувофиқ ҳисоблаб чиқарилган солиқ солинадиган база  янги технологик асбоб-ускуналар олишга йўналтирилган маблағлар суммасига (солиқ солинадиган базанинг кўпи билан 25 фоизига) камайтирилади. Солиқ солинадиган базани камайтириш технологик асбоб-ускуна бўйича у фойдаланишга топширилган пайтдан бошлаб беш йил ичида амалга оширилади.

Ушбу имтиёз 2019 йил 14 майдан бошлаб қўлланилиши мумкин.

5715-сонли Президент Фармони 2019 йил 14 майда “Халқ сўзи” газетасида расман эълон қилинган. Фармоннинг ўзида унинг ёки унинг бирон бир бандининг кечроқ кучга кириши айтилмаган.

Норматив-ҳуқуқий ҳужжатлар, агар ҳужжатларнинг ўзида кечроқ муддат кўрсатилган бўлмаса, улар расмий эълон қилинган кундан эътиборан кучга киради. Президент Фармонлари орқага қайтиш кучига эга эмас ва улар амалга киритилганидан кейин юзага келган ижтимоий муносабатларга нисбатан татбиқ этилади (“Норматив-ҳуқуқий ҳужжатлар тўғрисида”ги Қонуннинг 30, 31-моддалари).