Савол мазмунидан англашилишича, Сиз касаначилар билан фуқаролик-ҳуқуқий шартнома тузмоқчисиз (ФКнинг 703-708-м.). Фуқаролик-ҳуқуқий шартнома (кейинги матнда – ФҲШ) бўйича иш бажарувчи шахс ижрочи, Сизнинг корхонангиз эса буюртмачи бўлиб ҳисобланади.  ФҲШ шартлари бўйича буюртмачи ижрочини ишларни бажариш учун керакли дастгоҳлар ва материаллар билан таъминлаш мажбуриятини олиши мумкин. Демак, шартнома шартларига асосан ижрочилар корхонанинг ўзида ишларни бажаришлари мумкин.

Таъкидлаш жоизки, ФҲШ буйича ишловчи шахсларга меҳнат қонунчилиги тадбиқ қилинмайди. Бироқ, ходимларнинг ўртача йиллик сонини аниқлашда пудрат шартномалари ва бошқа фуқаролик-ҳуқуқий тусдаги шартномалар бўйича ишга қабул қилинган ходимларнинг сони ҳам ҳисобга олинади (СКнинг 350-м. 3-қ.).

Масалан, агар Сиз бошқа тўқимачилик ва трикотаж маҳсулотларини ишлаб чиқарувчи кичик корхона  (14.39.0) тоифасига кирсангиз, Сизда ишчиларнинг йиллик ўртача сони 200 кишидан ошмаслиги керак (24.08.2016й. 275-сон ВМҚги 1-илова). Белгиланган миқдордан ортиқ ходимларни штатга меҳнат шартномаси бўйича қабул қилсангиз ҳам, ФҲШ асосида шахсларга иш бажаришни топширсангиз ҳам, бу ходимларнинг ўртача йиллик сонини аниқлашда ҳисобга олинади.